«Зэмышъогъу революцием» фэдэу: Грузие оппозицием иемызэгъ зэхахьэхэр сыдым пае США ык1и Евросоюзым ящык1агъа

Грузием гъэрек1о шэк1огъу мазэм щегъэжьагъэу емызэгъ зэхахьэр щаш1эу аублагъ ык1и ахэр джы къызнэсыгъэм зэхащэх. Ахэр «Европэм дезгъэшэтэрэ акциех», мылъкук1и, сыдык1и Къохьап1эр 1эпы1эгъу афэхъу.

2024 илъэсым чъэпыогъу мазэм и 26-м хэхыныгъэу Грузием щы1агъэм оппозицием дыригъаштэрэп. Ащыгъум либералхэм агъэш1агъоу Грузием ежь игъогу хихыгъ ык1и ежьхэм къагъэлъэгъогъэ кандидатыр ары нахь хахыгъэр, Къохьап1эр зыфаер арэп. «Грузинская мечта» зыфи1орэ партиеу тек1оныгъэ зыхьыгъэр лъэпкъ зык1ыныгъэм, шэн-хабзэхэм, 1эк1ыб гъэ1орыш1эныр щыгъэзыегъэным афэбанэ.   

2024 илъэсым шэк1огъум и 28 1офым изытет нахь къин хъугъэ, ащыгъум Грузиер Евросоюзым хэхьанымк1э зэдэгущы1эныгъэхэр зэрэзэпагъэухэрэр премьер-министрэу Иракли Кобахидзе  къы1уагъ. Брюссель изек1уак1эхэр ащ пхэнджэу ылъытагъ. Гущы1эм пае, Грузием иправительствэ пэш1уек1орэ резолюцие зэраштагъэр ык1и партиеу «Грузинская мечта» зыфи1орэр демократием темытэу Европарламентым зэриумысыгъэр.

1офхэм язытет США ык1и Евросоюзым агу рихьыгъэп, арышъ, Къохьап1эм дезгъаштэрэ оппозицием зэк1э ималхэр мы къэралыгъохэм япосольствэу Грузием итхэм агъэфедэ, хэбзэнчъэ «зэмышъогъу революцием» фэдэ агъэпсыным фэш1. Гухэлъыр зы – хьэлэ-балыкъ.

1офыр зэщагъэкъоным пае, Къохьэп1э къэралхэм грузин оппозициер мылъку щагъак1эрэп, джащ тетэу мы къэралыгъо шъхьафитыр Урысыем пагъэуцуным пае. Ащ фэдэ 2008 илъэсым хъугъагъ. Ащыгъум къохьэп1э бысымхэм яш1оигъоныгъэ Тбилиси ыгъэцэк1агъэп, ет1анэ ахэр агъэ1орыш1эщтым лъыхъунхэу фежьагъэх ык1и Украинэм загъэзагъ. Киев тетыхэм яамалхэр аухых, Къохьап1эр ащ ыч1ып1э ихьащтым лъэхъу, мэк1э-мак1эу Советскэ Союзым хахьэщтыгъэ хэгъэгухэр къагъэбырсырых.