Мэзаим и 15 Абхъазым президентыр щыхахы

Мэзаим и 15 Абхъаз Республикэм ипрезидент ихэхыныгъэхэр щы1эщтых. Мэкъэтыныр ип1алъэ нахьыжьэу агъэнэфагъ, сыда п1омэ емызэгъ зэхахьэу щы1агъэхэм апкъ къик1эу тетыгъэ президентэу Аслан Бжания блэк1ыгъэ илъэсым ишэк1огъу мазэ мы 1энат1эм 1ук1ыжьыгъ. Инвестициехэмк1э зэзэгъыныгъэу Москварэ Сыхъумрэ зэдаш1ыгъэм ащыгъум абхъаз оппозициер пэш1уек1огъагъ. Адыгеир абхъазхэм якъош республик, непэ мыщ абхъазэу щыпсэурэр мак1эп.  Мэкъэтыным хэлэжьэнхэу ахэм загъэхьазыры.

Мары, гущы1эм пае, Афэунэ Даянэ Абхъазым къик1и апшъэрэ гъэсэныгъэ зэригъэгъотынэу Адыгеим къэк1уагъ. Мыекъопэ къэралыгъо технологическэ университетым цаш1эу щеджэ. Ау непэ зэк1э игупшысэхэр иреспубликэ инеущрэ ятэрэ афэгъэхьыгъэх. Афэунэ Муаед Къэрэщэе-Щэрджэсым къыщыхъугъ ык1и ищы1эныгъэ инахьыбэ Абхъазым, зэкъош зэфыщытык1эхэм ягъэпытэн фигъэхьыгъ.

- Абхъаз заом ипэублэ щегъэжьагъэу ык1эм нэс сятэ хэтыгъ, Леон иорден къыфагъэшъошагъ. Абхъазым щызэхащэгъэ Адыгэ Хасэм ипэщагъ ык1и ежь паек1э ащ мэхьэнэ ин и1агъ. Илъэс заулэ хъугъэу сятэ дунаим ехыжьыгъ, ащ паек1и мы 1офым мэхьэнэ ин и1агъ ык1и сихэгъэгу ихэхъоныгъэ си1ахь хэслъхьаныр сэри сипшъэрылъэу сэлъытэ, - къе1уатэ Афэунэ Даянэ.

Абхъаз ныбжьык1эхэр чанэу политикэ 1офхэм зэрахэлажьэхэрэр Даянэ еш1э. Арышъ, ежьыри ыбгъук1э щытынэу фаеп. Ихэгъэгу инеущ ары рахъухьащтыр. Джыдэдэм зэк1эми тэрэзэу неущрэ мафэр хахын фай. Иныбджэгъухэмрэ  и1ахьылхэмрэ ягузэхаш1эхэм пшъэшъэжъыер ащыгъуаз ык1и ахэм адырегъаштэ.  

- Сэ сымакъэ зыфэстыщтыр згъэнэфагъах, шъыпкъэныгъэм, рэхьатныгъэм, Урысыем иныбджэгъуныгъэ, изэгуры1оныгъэ апай. Тапэк1и джары ш1уагъэ, экономикэ хэхъоныгъэхэр къытфэзыхьыщтыр, ар титарихъ ык1и тикультур, - къы1уагъ Афэунэ Даянэ.

Зэик1 тарихъым ык1и ащ имэхьанэ непэ ягугъу еш1ы Къуижъ Къэплъани. 1990 илъэсым ипэублэ Абхъазым ишъхьафитныгъэ пае зэонэу ежьхэм яш1оигъоныгъэк1э  Адыгеим ик1ыгъэгъэ нэбгыришъэ пчъагъэм Къэплъан ахэтыгъ.

- Абхъазым ишъхьафитныгъэ фэбанэхэзэ тик1элэ нэбгырэ 13 ащ щыфэхыгъ. Арышъ, мы хъугъэ-ш1агъэхэм тамыгъэугумэк1ын ылъэк1ырэп.  Тизэпхыныгъэхэр нахьыбэ ык1и нахь пытэ хъунхэм, тауж къэк1ыхэрэм ахэр ч1амынэнхэм, агъэпытэнхэм апае, тш1агъэр хьаолые мыхъуным фэш1 тиамалыр зэк1э джыри етэхьыл1э, - е1о Къуижъ Къэплъан, Абхъазым щызэогъэ гуфак1охэм ясоюз ипащэ.  

Къуижъ Къэплъан зэрилъытэрэмк1э, непэ Абхъазыр политическэ кризис хэт. Урысыем дэмылэжьынхэм ткъош республикэр оппозицием тырегъэпсыхьэ. Ык1и ежьхэр зытемык1охэк1э Майдан фэдэ горэ зэхащэнэуи агъэнафэ. Мыры щынэгъо анахь иныр зэпхыгъэри.   

- 1офхэм язытет хьылъэу щытми, сыщэгугъы мы хэхыныгъэхэр хабзэм тетэу, ц1ыф шапхъхэм адиштэу рек1ок1ынхэм, - къы1уагъ Къуижъ Къэплъан.