Адыгеим илIышъхьэу КъумпIыл Мурат зипэщэ лIыкIо купыр Кавказ инвестиционнэ форумэу къалэу Минеральные Воды щыкIорэм хэлажьэ.

Апэрэ мафэм IофшIэным ижъотыпIагъ – УФ-м иправительствэ хэтхэм, Темыр-Кавказ федеральнэ ишъолъырхэм ичlыпlэхэм япащэхэм, инвесторхэм зэIукIэгъухэр адыряIагъэх, зэзэгъыныгъэхэр адашIыгъэх. КъумпIыл Мурат къызэрэхигъэщыгъэмкIэ, республикэм мылъку къыхэзылъхьэрэр къэралыгъом исатыушIхэр арэу зэрэщытым мэхьанэшхо иI.

Ахъщэхалъхьэ  инхэми, езыгъэжьэгъэкIэ сатыушlхэми тапэкIи тадэIэпыIэным тыфэхьазыр — уицыхьэ зытелъын плъэкIыщт пстэоу сатыум хэхъоныгъэ егъэшIыгъэныр, кIэу къэхъурэр зэкlэ  пхырыщыгъэныр, къэралыгъо IэпыIэгъур акъыл хэлъэу гъэфедэгъэныр зипшъэрылъхэм Iоф адэтшIэщт», — къыIуагъ ащ ыкIи къыкIигъэтхъыгъ мы зэпстэуми Адыгеим исоциальнэ щыIэкIэ-псэукIэ къызэраIэтырэр, IофшIапIэхэм ахэхъо, хэбзэIахьхэр нахьыбэ мэхъух, социальнэ пшъэрылъхэр зэрагъэцэкIэщтхэ амалхэм заушъомбгъу.