Кавказ хьисап олимпиадэр Мыекъуапэ щэк1о

Кавказ хьисап олимпиадэм хэлэжьахэрэм ык1и изэхэщак1охэм Адыгеим ил1ышъхьэ а1ук1агъ. Мы олимпиадэм нэбгыри 158-рэ Мыекъуапэ къыщиугъоигъ, ахэр Урысыем ишъолъыр 20-мэ ык1и 1эк1ыб къэралыгъо 14 къарык1ыгъэх. Адыгэ къэралыгъо университетым олимпиадэр щэк1о. Ащ хэлэжьахэрэм егъэджэн зэфэшъхьафхэр афызэхащэх, къэгъэлъэгъонхэр къафатых, тарихъ ч1ып1эхэм ащэх, тич1ыопс арагъэлъэгъу.

Олимпиадэм хэхьэрэ егъэджэнхэм яз республикэм ил1ышъхьэ щы1агъ. Хьисапымк1э ык1и физикэмк1э ш1эныгъэлэжьхэм Къумп1ыл Мурат гущы1эгъу афэхъугъ, Адыгеим иапшъэрэ еджап1эхэм ащагъэцэк1эн алъэк1ыщт проектхэм атегущы1агъэх. Ныбжьык1э 1эпэ1асэхэм 1эпы1эгъу афэхъунхэм пае республикэм 1офэу щызэш1уахырэм игугъу аш1ыгъ.