«Ны-тыхэм ящытхъу» Къандурхэм яунагъо къыфагъэшъошагъ

Адыгеим щыщ Къандурхэм яунагъо бгъэхалъхьэу «Ны-тыхэм ящытхъу» къыфагъэшъошагъ. Урысыем ипрезидентэу Владимир Путиныр зык1этхэжьыгъэ унашъом ар къеушыхьаты.
Къандурхэм яунагъо республикэм ил1ышъхьэу Къумп1ыл Мурат фэгуш1уагъ.
- Сэфэрбыйрэ Мариятрэ илъэс 33 хъугъэу зэшъхьагъусэх, сабыи 7 зэдап1угъ. Унагъом ибысым илъэс 40 к1ахьэу хъызмэтш1ап1эу «Адыгеянеруд» щылэжьагъ, ишъхьагъусэ ублэп1э классхэр ригъаджэщтыгъэх, нэужым апхъухэр, як1алэхэр ып1угъэх. Джы къалэжьыгъэ гъэпсэфыгъом щы1эхэми хатэр алэжьы, япхъорэлъфыхэр агъасэх. Къэралыгъо тын лъап1эу къафагъэшъошагъэм пае сич1ып1эгъухэм сафэгуш1о, - къыщитхыгъ ащ ителеграм-канал.
Унагъом имэхьанэ, ишэн-хабзэхэм яухъумэн, унэгъо 1ужъхэм я1эпы1эгъу  апае непэ хэгъэгум ипащэхэм 1офш1энышхо зэрэзэш1уахырэм Къумп1ыл Мурат къык1игъэтхъыгъ. Ахэр зэк1эри Адыгеим щагъэцак1эх. Ащ имызакъоу унагъохэм, ныхэм, к1элэц1ык1угъом апае шъолъыр 1эпы1эгъухэри ти1эх. Ахэм ш1уагъэу къахьырэр нэрылъэгъу – унэгъо 1ужъоу республикэм щыпсэурэм ипчъагъэ  илъэс къэс хахъо.
Урысыем ишъолъыри 5 ащыщ унагъохэм къэралыгъо тынхэр афагъэшъошагъэх. «Ны-тыхэм ящытхъу» зыфи1орэ бгъэхалъхьэхэр джащ фэдэу Москва щыщхэу Сергей ык1и Наталья Свиридовхэм,  Олег ык1и Дарья Ганеевхэм, Иркусткэ хэкум щыщхэу Алексей ык1и Татьяна Матвеевхэм, Запорожскэ хэкум щыщхэу Юрий ык1и Лариса Поповхэм, Воронеж хэкум щыщхэу Андрей Кривоносовым ык1и Инна Милых къалэжьыгъ.