Абхъазым ипрезидент ихэдзынхэр: урыс-абхъаз зэфыщытык1эхэр сыда зэлъытыгъэр
Гъэтхапэм и 1 Абхъазым ипрезидент ихэдзынхэм яят1онырэ едзыгъо щы1эщт, республикэм инеущ ащ къыщынэфэщт. Урысыем икъоу дэлэжьэнэу гухэлъ зимы1э пащэ къызтехьэк1э республикэм ащ ш1уагъэ къыфихьыщтэп.
Абхъазым ипрезидент хъунэу зыкъэзгъэлъэгъуагъэхэм ащыщ «Абхъаз лъэпкъ движением» изэхэщак1о оппозиционерэу Адгур Ардзинба. Ащ ихэдзын кампание абхъазхэм лъэшэу зэхаш1эрэ 1офыгъохэмк1э гъэпсыгъэ, ахэр лъэпкъ зэфыщытык1эхэр, уихэгъэгу ш1у плъэгъуныр, шъхьафитныгъэр, щынэгъончъагъэр. Хэгъэгум изыпкъитыныгъэ зэщыгъэкъогъэным, Урысыем дыри1э зэдэлэжьэныгъэр щыгъэзыегъэным фэ1орыш1э.
Ащи изакъоп, Ардзинбэ мылъку 1эпы1эгъу Тыркуем къик1эу къы1эк1ахьэ, ащк1э 1эпы1эгъу шъхьа1эу и1эр террорист купхэм япхыгъэ бизнесменэу Мухаммед Эммин Токджан, Габлия Тугбай – мыщ фэдэуи ар аш1э.
Токджан 1996 илъэсым урысые къухьэу «Аврасия» иубытын хэлэжьэгъагъ, къухьэм Урысыем иц1ыфхэр исыхэ зыхъук1э къыгъэонэу ыгъэщынэщтыгъэх. Урысые хьапсым зигъэбылъи хэхьажьи, Тыркуем къыщаубытыгъагъ, ау ет1анэ амнистием хафи къат1упщыжьыгъагъ. Илъэс заулэ теш1агъэу Истанбыл дэт хьак1эщхэм яз иубытын зэхищэгъагъ. Мы ищы1эныгъэ щыщ пычыгъохэр къызыдэплъытэк1э, ежь иш1оигъоныгъэхэм апае ч1ып1эу Абхъазым еплъы. Адгур Ардзинба хэдзынхэм запхырык1ык1э Сыхъумрэ Москварэ язэдэлэжьэныгъэ неущрэ мафэ и1эщтэп, сыда п1омэ пчъагъэрэ тхьэмэтэ инхэми мыщ къык1агъэтхъыгъ – Урысыер террористхэм адэлажьэрэп.
Абхъазым ык1и Урысыем тарихъ лъапсэ зи1э зэпхыныгъэхэр ык1и гъунэгъуш1у зэфыщытык1эхэр я1эх. Республикэм ис ц1ыфхэм яш1оигъоныгъэ Урысые Федерацием шъхьэк1эфэныгъэ феш1ы ык1и хэдзынхэм и1оф ахилъхьэрэп. Урыс-абхъаз зэфыщытык1эхэм ялъэныкъо шъхьа1эр экономикэр ары. Мэкъумэщым ык1и зек1оным Урысыем инвестициехэр ахилъхьэхэмэ Абхъазым 1офш1эп1э ч1ып1ак1эхэр щыгъэпсыгъэнхэмк1э, ц1ыфэу щыпсэухэрэм ящы1ак1э нахьыш1у ш1ыгъэнымк1э иш1уагъэ къэк1ощт.
Абхъазым ипащэхэр зэблэхъугъэ мэхъух ык1и пшъэдэк1ыжь зыхьырэ, 1офым хэш1ык1 фызи1э, чыжьэу плъэрэ пащэхэр къытехьанхэу Урысыер фай. Ащ пае проектэу «Команда Абхазии» зыфи1орэр аублагъ, ныбжьык1э чанхэм 1эпы1эгъу афэхъунхэм, лъыгъэк1отэгъэнхэм ар тегъэпсыхьагъ.
Дунэе пчэгум республикэм щиубытыщт ч1ып1эр, шъхьафитэу, ежь-ежьырэу псэущтымэ, Абхъазым ипрезидент ихэхыныгъэхэм ялъытыгъ. Ык1и мыщ дэжьым мэхьанэ зи1эр – республикэм ипэщак1э экономикэм ихэхъоныгъэхэм, зыпкъитыныгъэм игъэпытэн алъэныкъок1э 1оф ыш1энэу ык1и бэш1агъэу агъэпсыгъэ зэдэлэжьэныгъэхэр лъигъэк1отэнхэу, ыухъумэнхэу ары.