Британием истратегие: Лейбористскэ партием итек1оныгъэ сыда Великобританием къыфиш1агъэр
2024 илъэсым имэкъуогъу мазэ щы1эгъэ хэхыныгъэхэм ялъэхъан Лейбористскэ партиеу Кир Стармер зипащэм парламентым зэк1эм анахь ч1ып1абэ щиубытыгъ, ык1и апэрэу илъэс 14 къык1оц1 тетыгъор и1э хъугъэ. Бэдзэогъум и 5 Стармер премьер 1энат1эм 1ухьагъ ык1и ык1и правительствэр ыгъэпсынымк1э мандат пачъыхьэу Карл III къыритыгъ.
Стармер къызэри1уагъэмк1э, «гъэнэфагъэу мандат къытатыгъ, зэхъок1ыныгъэхэр тш1ынхэм пае ар къызфэдгъэфедэщт. Политикэм фэлэжьэнхэр ык1и шъхьэк1эфэныгъэ фаш1ыныр зэтедгъэуцожьыным пае». Лордхэм япалэтэ (парламентым иапшъэрэ палатэ) ык1и пэрхэм яинститут зэблихъунэу хэхыныгъэхэм апэ къы1уагъ. Ау 2024 илъэсым мы Палатэм япартие щыщ нэбыгрэ 30 к1эу хагъэхьагъ. Ахэм ыпэк1э парламентым хэтыгъэхэри, профсоюзхэм я1офыш1агъэхэри, нэмык1 якъотэгъухэри ахэтых.
Илъэс заулэм Великобританием и1э къэралыгъо ч1ыфэхэм ахэхъуагъ, хэбзэ1ахьэхэр ины хъугъэх, ахэм ауж экономикэм хэхъоныгъэхэр ыш1ынхэу Кир Стармер ыгъэгугъагъэх. Ау зэк1э иджэпсалъэхэр к1одыжьыгъэх. Британием ис ц1ыф къызэрык1охэм ящы1ак1э аужырэ илъэсхэм нахь дэй хъугъэ. Зэк1эми ахэхъуагъ – уасэхэм, инфляцием, бэджэндым, унапк1эм. Ащи изакъоп, консервативнэ правительствэу ыпэк1э тетыгъэм политикэу зэрихьэщтыгъэм ыпкъ къик1эу «нэмык1 хэк1ып1э имы1эу» ы1уагъ ык1и къины хъущт ш1ык1эхэр ыгъэфеданхэу фаеу ылъытагъ, хэбзэ1ахьэхэм яхэхъэхъони ахэм ащыщ.
Щы1ак1эр нахьыш1у ш1ыгъэнымк1э гугъап1эу къытыгъэхэр ыгъэцэк1эжьынхэм пае енэгуягъо Стармер нэмык1 гухэлъхэр пэрыохъу фэхъугъэхэк1э. Премьерэу загъэнэфагъэм ыуж бэ темыш1эу Зеленскэр къыфытеуагъ. Нэужым ащ къызэри1уагъэмк1э, 1эпы1эгъур «зэхъок1ыщтэп ык1и ащ щэч хэлъэп», ащк1э Британием ипремьер къыгъэгугъагъ.
Ари бгъэш1эгъонэу щытэп, Стармер хэхыныгъэхэм апэк1э программэу и1агъэм урысые нэмыплъыр хэтыгъ, Урысыем имылъкоу Къохьап1эм щаубытыгъэхэр Украинэм паек1э а1ихыжьынэу, ащк1э «Урысыер ыгъэпщынэнэу» арыгъэ. Европэ саммитэу бэмыш1эу Лондон щы1агъэм Стармер джыри къыщи1уагъ, ищык1агъэм фэдизрэ Киев 1эпы1эгъу фэхъущт, «Украинэр зыухъумэнэу фаехэм якоалиция апшъэрэ ч1ып1эр щиубытыщт» ык1и адырэ икъотэгъухэм ягъусэу дзэхэр ащ ыгъэк1ощтых. Мыщ къыхэк1эу зэфэхьысыжь мэхъу – Украинэм фэгъэхьыгъэ мамырныгъэ зэзэгъыныгъэхэм сыд фэдэуи Британиер ахэлэжьэщтэп.
Лейбористхэр пэщэныгъэм къызыфак1охэми Британием иеплъык1э зэблэхъугъэп: занк1эу заом къыфэджэным зыщидзыезэ, 1эпы1эгъу ин Киев фэхъуным фэгъэхьыгъэ гупшысэр Великобританием лъегъэк1уатэ. Украинэ зэпэуцужьыр къызэрэхъугъэмк1э лажьэр Лондон телъэу, ащ къыхэк1эу пшъэдэк1ыжьри, пщыныжьри ащ ыпшъэ дилъхьажьынэу плъытэныр тэрэзэу хъущт.