«Ш1ур къуаджэм пай» - мы 1офтхьабзэр чылэгъо 28 ащызэщэщт

Урысые 1офтхьабзэу «Ш1ур къуаджэм пай» зыфи1орэр Адыгеим щылъагъэк1уатэ. 2025-рэ илъэсым чылэгъо 28 к1ощтых ык1и ахэм адэсхэм япсауныгъэ изытет ауплъэк1ущт.

Мыгъэрэ апэрэ дэк1ыгъом Теуцожь районым медицинэм и1офыш1эхэр к1огъагъэх. Лъэныкъо зэфэшъхьафхэмк1э 1азэрэ врачхэри, ЭКГ зыш1ыхэри ахэмэ ахэтыгъэх.

Зы мафэм нэбгырэ 30 фэдизмэ япсауныгъэ изытет ауплъэк1ун алъэк1ы. Ахэмэ уз горэ къафыхагъэщымэ ащ е1эзэщт докторым дэжь сымаджэр агъак1о.

Псауныгъэм иухъумэнк1э министерствэм къызэрэща1уагъэмк1э, илъэсым къык1оц1 къоджэдэс нэбгырэ мин фэдиз къызэлъаубыты. Медицинэм иволонтерхэри врачхэм ягъусэхэу чылэхэм адак1ох. Джащ фэдэу гъэтхэпэ мазэм Пчыхьэл1ыкъуае, Шевченкэм, Джэджэхьаблэ уплъэк1унхэр ащаш1ыщтых.