Культурэм ихэхъоныгъэк1э гупчэу «Ошъад»

Культурэм ихэхъоныгъэк1э гупчэу «Ошъад» къутырэу Гавердовскэм къыщызэ1уахыгъ. Лъэпкъ проектэу «Культурэм» иш1уагъэк1э ар агъэпсыгъ ык1и сомэ млн 151 тефагъ. Гупчэу «Ошъадым» щы1агъ л1ышъхьэу Къумп1ыл Мурат. 

Культурэм ихэхъоныгъэк1э гупчэу «Ошъадыр» къатит1у мэхъу,  квадратнэ метрэ мини 1,2 еубыты. Апэрэ къатым гъэлъэгъоп1э залэу т1ысып1э 200 зи1эр тет. Сурэтш1ыным, 1эш1агъэхэм апае унэхэр, тхылъеджап1э, макъэ зыщытыратхэрэ студие, шхап1э ащ тетых.  Къэшъоп1э залыр, орэдкъэ1оным пае унэр ят1онэрэ къатым щы1эх. 

Культурэм ихэхъоныгъэк1э гупчэу «Ошъад» ипащэр Едыдж Виктория. Мыщ творческэ зэхэхьау «Ошъадыр» щылэжьэщт. Ащ хахьэх купхэу «Синдика», «Бэгъэудж», «Ащэмэз», к1элэц1ык1у къэшъок1о купэу «Ошъад». Джащ фэдэу орэды1о студиехэу «Ви-за-ви», «Шанс» ык1и къэшъок1о купэу «Непоседы» мы гупчэм зыщагъэсэщт.