Зек1оным тегущы1агъэх

Урысые ш1эныгъэ конференциеу зек1оным фэгъэхьыгъэр Адыгэ къэралыгъо университетым щык1уагъ. Москва, Астрахань, Волгоград, Донецк, Краснодар, Налщыч, Ростов-на-Дону, Тамбов ащыщхэр ащ хэлэжьэнэу фаехэу ятхылъхэр къагъэхьыгъэх. Ахэр апшъэрэ еджап1эхэм ял1ык1охэу зек1оным тегъэпсыхьэгъэ сэнэхьатхэмк1э езгъаджэхэрэр ары. Ш1эныгъэ конференциер АКъУ-р илъэси 85-рэ зэрэхъугъэм фагъэхьыгъ. Джащ фэдэу университетым зэхэщэн 1офымк1э гъусэ къыфэхъугъ зек1онымк1э республикэ комитетыр.

Непэ зек1оным изытет, ащ фэгъэхьыгъэ хэбзэгъэуцугъэхэм зэхъок1ыныгъэу афэхъугъэхэр, мыщ ылъэныкъок1э проектэу агъэцак1эхэрэм атегущы1агъэх. Зек1оным, хьэк1эным ащылэжьэщтхэм ягъэхьазырын ары нахь игъэк1отыгъэу зигугъу аш1ыгъэр.